بسكويت القرفة

ممكن ترشّي على البسكويت سكر بودرة للتزيين

بسكويت القرفة
المقادير:
3 كوب دقيق
كوب سكر ناعم
3 ملعقة كبيرة قرفة
ملعقة صغيرة بيكينج باودر
مربى مشمش
كوب زبدة
2 بيضة
ذرة ملح

الطريقة:
1- اضربي الزبدة مع السكر بالمضرب الكهربائي، لحد ما يتحوّل لمزيج متجانس وهش، وبعد كده ضيفي البيض، واستمري في الخفق بالمضرب.

2- ضيفي الدقيق والبيكينج باودر والقرفة، وقلبي العجين بملعقة كبيرة، ولما يبدأ في الاختلاط، اضربيه بالمضرب لمدة دقيقتين، ولما تبقى عجينة متماسكة، لفّيها في ورق الزبدة، ودخّليها التلاجة لمدة نص ساعة.

3- بعد كده طلّعيها، وافردي العجينة وشكّليها دوائر باستخدام أي شكل دائري (ممكن كوباية أو غطا برطمان)، واستخدمي حاجة دائرية أصغر علشان تعملي فجوات في نص الدواير الكبيرة؛ بحيث تكون مفرّغة من الوسط.

4- هاتي الصينية اللي هتخبزي فيها، وافردي فيها ورق الزبدة، وحطّي فيها البسكويت، ودخّليها فرن ساخن على درجة حرارة 190 لمدة ربع ساعة لحد ما تستوي.

5- طلّعي البسكويت وسيبيه يبرد شوية، وبعد كده الزقي كل قطعتين في بعض باستخدام مربى المشمش، وممكن ترشّي على وشه سكر بودرة، وقدّميه مع الفطار الصبح.. وبالهنا والشفا.